ភ្នំពេញ ៖ យោងតាមសេចក្តីជូនដំណឹងស្តីពីស្ថានភាពទឹកជំនន់ទន្លេមេគង្គរបស់ក្រសួងធនធានទឹក នៅថ្ងៃទី២៩ ខែកញ្ញា ឆ្នាំ២០២២ បានលើកឡើងថា យោងលើស្ថានភាពអាកាសធាតុ ដែលបាននឹងកំពុងមានការប្រែប្រួលដែលកើតឡើងដោយសារឥទ្ធិពលព្យុះទី១៦ ឈ្មោះណូរុ «NORU» មកលើអាងទន្លេមេគង្គក្នុងប្រទេសថៃ ឡាវ វៀតណាម និងកម្ពុជាដែលធ្វើឲ្យមានភ្លៀងធ្លាក់ច្រើននៅក្នុងអាងទន្លេមេគង្គ ។
ក្រសួងបានលើកឡើងថា ស្ថានភាពបែបនេះនឹងធ្វើឲ្យទឹកទន្លេមេគង្គនឹងហក់ឡើងក្នុងរយៈពេលពី៣ ទៅ៥ថ្ងៃខាងមុខ ជាពិសេសនៅភាគខាងលើនៃប្រទេសកម្ពុជា មានខេត្តស្ទឹងត្រែង ទឹកនឹងអាចឡើងដល់កម្ពស់១០,០០ ម៉ែត្រ, ខេត្តក្រចេះទឹកនឹងអាចឡើងដល់កម្ពស់២១,០០ម៉ែត្រ និងខេត្តកំពង់ចាមទឹកនឹងអាចឡើងដល់កម្ពស់១៤,៣០ម៉ែត្រ។
រីឯនៅស្ថានីយជលសាស្ត្រភ្នំពេញ-ចតុមុខទឹកអាចឡើងដល់កម្ពស់ ៩,៤០ ម៉ែត្រ ។ ក្រសួងថា ទឹកទន្លេដែលហក់ឡើងនាពេលនេះនៅមិនទាន់ដល់កម្រិតឲ្យមានការប្រុងប្រយ័ត្ននៅឡើយទេ តែទឹកអាចនឹងហូរចូលលិចតំបន់ទំនាបមួយចំនួនអមតាមដងទន្លេ និងបន្តហូរចូលតាមបណ្តាព្រែកបន្ថែមទៀត។ចំណែកនៅតំបន់ភាគឦសានទឹកទន្លេសេកុងកំពុងហក់ឡើងដែលអាចប្រឈមនឹងទឹកជំនន់។ អាស្រ័យដូចបានជម្រាបជូនខាងលើ សូមសាធារណជនជ្រាបជាព័ត៌មាន និងសូមបង្កើនការប្រុងប្រយ័ត្នខ្ពស់៕ប្រភព កោះសិន្តភាព
