ហេតុការណ៍ខាងលើនោះ បានកើតឡើងកាលពីវេលាម៉ោង៧និង១៥នាទីព្រឹក ថ្ងៃទី៣០ ខែកញ្ញា ឆ្នាំ២០២២ នៅតាមផ្លូវជាតិលេខ៣ ត្រង់ចំណុចភូមិអង្គត្រគៀត ស្ថិតក្នុងសង្កាត់កន្ទោក ខណ្ឌកំបូល រាជធានីភ្នំពេញ។ ហើយជនសង្ស័យដែលត្រូវចាប់ខ្លួននោះ ពុំទាន់ត្រូវបានស្គាល់អត្តសញ្ញាណនៅឡើយទេ ព្រោះពេលសួរនាំឆ្លើយអត់កើត បន្ទាប់ពីត្រូវកណ្ដាប់ដៃ រន្ទះជើងរបស់ប្រជាពលរដ្ឋឡើងទ្រោមខ្លួនទៅហើយ។ ចំណែកស្ត្រីរងគ្រោះក៏ពុំត្រូវបានស្គាល់ឈ្មោះផងដែរ ដោយក្រោយពេលកើតហេតុ គាត់បានយកកាបូបជិះម៉ូតូបន្តដំណើរទៅមុខបាត់ ពុំបានដាក់ពាក្យបណ្ដឹងនោះទេ ហើយនៅក្នុងកាបូបរបស់គាត់ដែលចោ.រឆ.ក់យកពុំបានសម្រេចនោះ គឺមានលុយពុំដល់១ម៉ឺនរៀលផង។
ជ.ន.សង្ស័.យចំនួន៤នាក់បានធ្វើសកម្មភាពឆក់កាបូបពីស្ត្រីអ្នកដំណើរម្នាក់ក្នុងខណៈពេលកំពុងជិះម៉ូតូតាមផ្លូវស្របទិសគ្នា ប៉ុន្តែឆក់មិនបានសម្រេចនោះទេ ដោយសារស្ត្រីរងគ្រោះប្រទាញប្រទង់ ធ្វើឲ្យជនសង្ស័.យភ្លាត់ស្នៀតធ្លាក់ពីលើម៉ូតូម្នាក់។ ភ្លាមៗនោះ ប្រជាពលរដ្ឋបានជួយដេញចាប់ និងវា.យទាត់ធាក់ បណ្ដាលឲ្យរងរបួសឡើងទ្រោមខ្លួន ហើយបើកុំតែបាននគរបាលចុះទៅជួយអន្តរាគមន៍ទាន់ ប្រហែលជាអាចនឹងស្លា.ប់បាត់ទៅហើយ ដោយឡែកបក្សពួក៣នាក់ទៀតជិះម៉ូតូគេចខ្លួនបាត់។
បើតាមអ្នកឃើញហេតុការណ៍បាននិយាយថា នៅមុនពេលកើតហេតុ ស្ត្រីរងគ្រោះមានគ្នា២នាក់បានជិះម៉ូតូ១គ្រឿងធ្វើដំណើរតាមផ្លូវជាតិលេខ៣ ក្នុងទិសដៅពីជើងទៅត្បូង លុះពេលទៅដល់ត្រង់ចំណុចកើតហេតុ ស្រាប់តែលេចមុខជនសង្ស័យចំនួន៤នាក់ជិះម៉ូតូ២គ្រឿងតាមពីក្រោយ។ នៅពេលទៅដល់ទន្ទឹមគ្នាជាមួយនឹងជនរងគ្រោះនោះ ជនសង្ស័យក៏បានធ្វើសកម្មភាពឆក់កាបូប ប៉ុន្តែពុំបានសម្រេចឡើយ ដោយសារស្ត្រីរងគ្រោះប្រទាញប្រទង់ដណ្ដើមយកបានវិញ។
ប្រភពដដែលបានប្រាប់ឲ្យដឹងទៀតថា ខណៈនោះជនសង្ស័យម្នាក់បានភ្លាត់ស្នៀតធ្លាក់ពីលើម៉ូតូ ហើយបានរត់គេចខ្លួន តែត្រូវប្រជាពលរដ្ឋដែលជាអ្នកដំណើរតាមផ្លូវបានជួយដេញតាម រហូតដល់ភូមិក្រាំងដូនទៃ សង្កាត់ចាមចៅទី២ ខណ្ឌពោធិ៍សែនជ័យ ទើបចាប់បាន បន្ទាប់មកក៏បានព្រួតគ្នាវា.យទាត់ធាក់ បណ្ដាលឲ្យរងរបួសទ្រោមខ្លួនតែម្តង ចំណែកបក្សពួក៣នាក់ទៀតជិះម៉ូតូគេចខ្លួនបាត់ស្រមោលដោយសុវត្ថិភាព។
ក្រោយពេលកើតហេតុ ស្ត្រីរងគ្រោះបានយកកាបូប រួចជិះម៉ូតូបន្តដំណើរទៅបាត់ ដោយពុំបានដាក់ពាក្យបណ្ដឹងឡើយ៕
